Filipçe: Tregimi për destabilizim është marrëveshje mes VMRO-së dhe BDI-së

Kryetari i LSDM-së, Venko Filipçe në një intervistë për të përjavshmen “Fokus” ka folur për çështjet aktuale politike në vend.

Në intervistë, Filipçe vlerëson se në aspektin politik, VMRO-DPMNE-së dhe BDI-së u përshtaten narrativat e konfliktit dhe destabilizimit ndëretnik. Kryetari i LSDM-së beson se strategjia e ngritjes së tensionit ndëretnik, të cilën sipas tij, dy partitë në fjalë e kanë zbatuar para zgjedhjeve, tani po rikthehet në lojë.

“Nëse marrim parasysh se BDI-ja i dha mbështetje VMRO-DPMNE-së për Ligjin për riorganizimin e ministrive, pa të cilin nuk do të mund të formohej Qeveria, atëherë nuk do të habitesha nëse e tëra është një strategji e dakorduar mes dy partive. Edhe nëse nuk është dakorduar, është në interes të të dyja palëve”, tha Filipçe në intervistë.

Sipas tij, skenarët e tillë ndikojnë negativisht në zhvillimin e ekonomisë dhe do të ngjallin frikë dhe konfuzion tek qytetarët.

“Fatkeqësisht, skenarë të tillë sjellin vetëm ngecje në zhvillimin e shtetit, ekonomisë, shumë konfuzion dhe frikë tek qytetarët. Nuk kemi parë asgjë të mirë nga çështjet e pafundme ndëretnike, përveç rritjes së tensioneve dhe regresionit të shtetit. Por është mirë që për dallim nga mandati i mëparshëm i VMRO-DPMNE-së, tani qytetarët dhe opinioni profesional i njohin shumë herët të njëjtat taktika dhe kështu efekti i tyre është i dobët”, deklaroi Filipçe.